夏日親子「Boat Trip」Fun Fun Fun

星期日係一家出外同大自然、同陽光玩下遊戲嘅好時間。剛剛過左嘅weekend，我地同好朋友仔一齊去左西貢海下灣玩左一日。一家三口第一次划安全艇出海，整個經驗都好開心、好特別，令我地有好多個「第一次」嘅美好回憶，真係好值得同小朋友去。

一早去到北潭涌集合，多謝 願景動力 Vision Power 嘅教練幫忙申請私家車禁區紙，所以我地幾個家庭可以好方便咁自己揸車入去海下灣海岸保育區。聽完教練講解，大家試下水，warm up下，做好安全措施，大伙兒出發到一個沙灘仔。一家三口坐一隻安全艇出發，沛沛坐係我同沛爸中間，好興奮。當然沛沛唔洗付出勞力啦，不過佢都好大聲同我地打氣，一齊數「1，2，1，2⋯⋯」，有時就大叫同老遠嘅朋友仔傾下計，真係幾攪笑。「0」體能嘅我，本來以為會辛苦到不得了，點知又覺得OK喎，天氣好好，D水好清涼，就算我完全無經驗都划得到，當然好在有沛爸係到啦！HEHE！！！

去到沙灘仔，小朋友都好開心可以玩水玩沙，仲可以親親小小海洋生物，海参、小蝦、小蟹、海螺仔、蜆仔、魚仔四處可見。之後我地係沙灘野餐，大人小朋友都好享受。雖然大家都只係可以帶D簡單乾糧上艇出海食，不過我好enjoy係沙灘搽麵包，食罐頭，同其他爸爸媽媽一齊講下「那些年」細個嘅時候野餐回憶，都幾好笑。而且見到小朋友大口大口咁食三文治個滿足樣，就更加覺得開心快樂有幾咁簡單，一切反璞歸真。

休息完之後，再出發去另外一個地方睇珊瑚。可惜小朋友太細唔適合跟其他隊友去浮潛，不過係水面都可以睇到水下面有好多靚珊瑚，小朋友都可以了解多D海洋生態。睇完珊瑚，我地划左去紅樹林尋找彈塗魚同寄居蟹，沛沛不斷揾貝殼已經玩到好開心。回程都已經4點幾，要划返去起點都真係有點想死，不過我不斷同自己講要減走D byebye肉，所以係有目標之下完成全程。YEAH！！！

去到大自然，可以同沛沛一齊體驗到簡樸嘅生活，連沖涼都只可以用凍水隨便淋下身，唔會用沐浴露，唔可以將污水流入海洋影響生態，真係從一件小事令小朋友知道大道理。呢D小事可能平時我地做父母都會忽略左，無教到小朋友，但係透過體驗式活動，小朋友同大人都可以有好深刻嘅學習同體會。

如果想查詢有關活動資料，可到 願景動力 Vision Power FACEBOOK 專頁留言查詢。

想睇更多活動照片，

可到：https://www.facebook.com/media/set/?set=a.625292874236032.1073741844.303648036400519&type=1