「就係呢粒熊仔餅」

昨晚工作完畢，回到家推門而進，聽到沛沛的聲音從她的房間傳來，大概猜到沛沛未睡著，我還未行到她房門外，爸爸已走出來了！
沛爸：佢要等你講故事呀！
沛沛：媽媽，你返嚟嗱？
（笑著的從床上走下來，抱著我說！）
沛媽：係呀！返嚟啦！你等我講故事呀？
沛沛：係呀！你咁夜先返嫁？
沛媽：係喎，我唔記得同你講我會夜返，SORRY！我宜家去洗手，換完衫就講Kipper故事俾你聽呀！
沛沛：好野！

我換好衣服便躺在沛沛的床上，等候她拿故事書回來！
不知為何，沛沛站在床邊突然情緒激動起來，更哭了起來。
沛沛：你唔可以訓係到！你要起身！
沛媽：媽媽係到等你攞書入嚟，你冷靜D先啦！做咩事喊？
（沛沛激動得說不出話來）
沛媽：你冷靜左先啦，慢慢講！
（沛沛不能即時平服，還有點惡，斷斷續續的說......)
沛沛：我好掛住你嫁ma，要俾粒熊仔餅你嫁ma！
（這時候沛爸剛好拿著一粒熊仔餅進來）
沛爸：媽媽，沛沛今日食剩一粒熊仔餅放係手好耐無食，我問佢做咩唔食，佢話要留返俾你！
（我呆了幾秒）
沛媽：原來沛沛唔想講故事住，想媽媽食左呢粒熊仔餅先！？
沛沛：係呀！你都唔等我！
沛媽：媽媽宜家知道啦！頭先沛沛好心急想同我分享呢粒熊仔餅，急到唔知點講，急起上嚟所以就喊啦！
沛沛：係呀！
沛媽：多謝你剩返最後一粒都留俾我！攬下先啦！

~~~~~~

當我還以為她無理發脾氣時，我身心疲倦時，我心裡有點氣憤時，我想開口責罵她時…發覺…我的孩子有多愛我…

「就係呢粒熊仔餅」証明當孩子得到爸爸媽媽的明白時，她可以冷靜下來了；証明當孩子感受到爸爸媽媽的愛時，她不再需要哭了！

「就係呢粒熊仔餅」教我多給孩子一點時間，多給孩子一點耐性，孩子真的有話要給我說！

「就係呢粒熊仔餅」教我知道孩子對我的愛不比我對她的少，她將自己手中僅餘的…也是留給我！

~~~~~

想知道更多我們的消息，請like 寶寶湊寶寶 Facebook Fan Page!

~~~~~