與孩子一起從玩樂中學習，從體驗中成長

今次海下灣出海之旅，令自己得著都好大，點解?

其實我一D都唔喜歡同陽光玩遊戲，更加唔喜歡水上活動，不過想沛沛有多D非物質嘅生活體驗，而且自己都未試過划艇出海，好好奇，仲要係一家三口同行，所以今次去左先算。見到D小生物，我真係有少少毛管動，再望下沛沛嘅反應，發覺佢都驚驚地，唔想佢好似我，咩都驚一餐，所以我自己都試下扮晒野，好似好勇敢、好願意咁摸下D海参、蟹仔，俾沛沛都有多D機會認識唔多嘅事物，對唔同新事物都可以保持開放態度，唔係要迫佢咩都要做到，唔係要同其他小朋友比較，而係只希望佢有多D初體驗，認識多D，嘗試多D。

見到其他媽媽都落水玩，後來自己都浸落水同小朋友玩下，原來發覺都幾舒服，可以好開心，唔行出第一步，我相信自己永遠都唔會知道自己「可以」、自己「做得到」。如果我經常都只係遠觀、唔參與，相信沛沛嘅學習模式都會受我影響，變得被動。有時，真係沛沛令我多左好多學生機會!

其實沖涼換衫嘅地方都真係好簡陋，蚊蟲四周圍走出嚟打招呼，我同自己講唔好諗唔好睇，快快手同沛沛、自己換完衫，扮晒冷靜之後走出嚟。可能因為我無表現到好抗拒，沛沛都好合作，快快手換衫!

父母永遠係小朋友最近、最直接、最重要嘅模仿對象，所以我同沛爸都經常互相提醒，要多做「好行為」，多嘗試，俾沛沛一個好榜樣! 

今日嘅社會，好多因素令我地父母都好自然將最好嘅留俾小朋友，俾好環境佢地學習、俾好條件佢地生活。學唔同嘅興趣班、食嘅係天然有機、玩嘅係高科技產品。呢個現象唔係只出現係有經濟能力嘅家庭，好多基層家庭都一樣，點都會慳D錢嚟俾小朋友學野、補習。如果有一日，我地做父母嘅再俾唔到呢D有素質嘅生活佢地，會點？值得我地好好諗下！

想同小朋友體驗多D，真係有時要行出安全區，認識社會、認識世界多D。其實好多野無得分得咁清「好與壞、對與錯」，行多一步，等自己同小朋友視野都廣闊D，最終由自己決定，由小朋友長大成人之後決定，因為最清楚自己嘅人係我地自己。有時候俾自己多一D空間整合下自己嘅經驗，明白多左，行一條適合自己嘅路。

有關「海下灣出海之旅」詳情，

可看看較早前的文章。

夏日親子「Boat Trip」Fun Fun Fun

http://utopiayeung.blogspot.hk/2014/07/boat-tripfun-fun-fun.html