「給與的快樂」解說

星期六賣旗過後，給了沛沛一支MINI的珍寶珠作為小小的獎勵，肯定她付出了的努力和給予的心。在她品嚐的同時，我與她進行解說(Defriefing)。

4F Debriefing: Fact/Feeling/Finding/Future

沛沛年紀少少，不可以問得太詳細，不過4F是很好的方向與人傾談及分享，跟小朋友同樣可以嘗試應用，而我個人比較喜歡先問感受問題。

沛媽：你今日同爸爸媽媽賣旗覺得點呀？
沛沛：覺得好開心呀！
沛媽：係呀！我都係呀！你覺得開心係因為......
沛沛：幫人囉！籌款呀！
沛媽：籌款幫助有需要嘅人你覺得好開心？！
沛沛：係呀！今次幫明愛呀！
沛媽：你知道係幫明愛。咁你最記得係D咩？
沛沛：最記得貼貼紙好好玩。
沛媽：你好鍾意貼支旗係人地件衫到，仲有呢？
沛沛：D人讚我乖，我好開心。
沛媽：係喎，有人讚都真係好開心，你今日做得好好，好合作，攰都堅持賣完D旗。咁你今日最大收穫係咩呀？
沛沛：籌款。（我仲以為係珍寶珠，好開心佢好明白賣旗嘅意思。）
沛媽：籌款嘅收穫係點呀？
沛沛：好好呀，好多人幫我買，因為我叫得好大聲「唔該，買支旗啦，幫下明愛啦」，哈哈！
沛媽：係呀，因為你叫得好大聲，行過左嘅人都聽到，仲會返轉頭幫你買，因為佢地都好欣賞你好俾心機幫助人。不過媽媽見你有時好攰唔想大聲叫，但係你見到d人同你買之後又再好開心笑笑口咁繼續再叫過，你好利害呀！
沛沛：哈哈！係呀，好開心呀！有d人俾好多錢我呀！
沛媽：其實俾多俾少都一樣，因為佢地幫助人嘅好心都係一樣嫁，唔需要用俾幾多錢嚟比較愛心有幾多。
沛沛：知道喇，媽媽！（我估佢明dd啦）
沛媽：下次再賣旗好無？
沛沛：好呀，好野！

賣旗從來不是一個簡單容易的事，不管對大人、孩子也是。別輕看賣旗這回事，需要很多能力和技巧的配合。

沛沛第4次賣旗，每一次都有不同的經歷和想法，與孩子解說分享，幫助她整合體驗，讓沛沛「給與的心」更濃。